LOU 16 DE MAI

 En 1838, l’Annuaire de Vaucluse citavo pèr lou Bausset: Es dins lou terraire dóu Bausset que se situïs lou famous ermitage de Sant Gènt, mounte lis abitant di vilage vesin se rèndon en roumavage.
La fèsto de Sant Gènt i’es noutado au 16 de Mai (aro dins li calendié l’an ramplaça pèr Sant Ounourat pèr segui la modo parisenco, en plaço de garda nòsti sant prouvençau).

  Lou 16 de Mai ei lou jour anniversàri de la mort de Sant Gènt. Es festejado, en particulié, pèr li dos parròqui de Mountèu e dóu Bausset.

  L’Écho de Saint Gens presènto ansin la fèsto en 1893 : Lou 16 de mai, ei fèsto chaumado pèr la poupulacioun dóu Bausset. Tre la vèio, à 9 ouro de vèspre, tambour en tèsto, se rèndon en proucessioun i cant di cantico davans l’estatuo boutado à l’intrado de la Vau Santo.
Aqui, après que siegue esta benesi pèr M. lou curat, s’atubo un fiò de joio, à l’ounour dóu sant labouraire. L’endeman la poupulacioun dóu Bausset se fai un devé de veni tournamai en proucessioun à la capello de l’Ermitage, que lis óufice ié soun celebra coume lou dilun de Pasco.[1]

  Agustin Boudin despinto la fèsto en partènt de Mountèu: Se ié vai de tóuti li païs envirounant, majamen d’Avignoun, de Carpentras e de Prouvènço. La fèsto coumenço la vèio à soulèu tremount. Dous enfant d’ùni 12 an porton la bandiero de Sant Gènt, e quatre autre soun estatuo. Aquésti darrié soun vesti de braio courto emé de guèto de nankin, un foulard jaune à l’entour de la tèsto[2].
 Èron à l’epoco benesi pèr lou curat de Mountèu pièi l’espetado d’uno tiro baiavo lou signe de la partènço de sa courso à-de-rèng devers l’ermitage. Li bouito e li fanfaro marcavon, éli, la debuto di manifestacioun. De cavalié escorton li jóuini pourtaire, que courron coume de fouletoun , seguissènt lou camin de si rèire, passant li ribiero de Ricavèu e de la Nesco, d’aigo enjusqu’is eissello de cop que i’a, e s’arrestant qu’au Bausset.

  Aqui, devers li 2 ouro de matin, li pelerin vengu d’en Durènço prenon l’estatuo e la porton proche de l’ermitage vers lou lié de la maire de Sant Gènt. Canton de cantico jusqu’à 7 de matin. Pièi li jóuini pourtaire de Mountèu porton mai l’estatuo jusqu’à la capello de l’ermittage qu’aqui se ié celèbro uno messo.

  Aquésti pourtaire soun chausi dintre li jouine li mai meritous de Mountèu, dins de famiho couneigudo pèr èstre ounèsto e pïouso. Es un ounour pèr éli; soun pièi counsidera emé respèt. (Boudin nous dis que i’a cinquanto an tout-bèu-just
— valènt-à-dire à la debuto dóu siècle XIX, e n’èro quasimen parié quouro l’escrivié 
— lou jouine Moutelen qu’aurié pas baia ’questo provo soulenno de soun amour pèr Sant Gènt aurié ’gu de peno pèr s’etabli dins soun païs natau).

  La participacioun à la fèsto èro l’óucasioun de rite de prouteicioun. Boudin signalo que fin-qu’à la debuto dóu siècle (lou XIXen), tóuti li nòvi dóu tèms di darniéri Pasco partien ensèn d’à chivau, li femo en groupo, faire lou roumavage pèr se sauva uno vido coumuno urouso.

  Dins d’ùni rituau se demando à Sant Gènt d’èstre apara di fèbre. Li pelerin passon souto brancan pourtant l’estatuo dóu Sant, e ié fan touca l’estatuo i pedas dis enfant, o i flour que pièi li gardon dins lis oustau. Emporton tambèn un pauquet de la terro qu’es à l’entour dóu cros dóu Sant.

  Coume de just, li roumiéu van béure à la font e ié prene d’aigo. Un fube de pelerin es is abord de la baumeto, pourgènt d’en pertout si boutiheto o si coucourdo pèr lis empli e pièi ansin empourta un pau d’aquesto aigo miraclouso.

  À la fin dis óufice, li roumiéu s’entournon. Lis enfant, bandiero en tèsto, capèu e boutouniero adourna de ferigoulo e de flour dóu campèstre, de brassadèu (à si bras), e ’n cantant à se desalena, lou pïous cantico de Sant Gènt. Li cavalié parton au galop, au brut di bouito, segui di tapo-quiéu (tilbury), càrri à banc, carreto e veituro decourado de bouis verd e de fougasso lusènto.

  Li pelerin s’arrèston à la capello de Sant Francés despièi 1864, aperavans à la capello de Sant Rafèu. En arribant à Mountèu, li pourtaire fan mai passa souto lou brancan dóu Sant tóuti li gènt que volon èstre apara de la malautié. Pièi la proucessioun fai lou tour de vilo, e cadun se fai un devé de i’assista.

  Tóuti rintron pièi dins la glèiso, alestido emé la poumpo di fèsto majo, resplendènto de lume e de flour, pèr assita au Salut dóu Sant Sacramen. Tres cop lou crid de Vivo Sant Gènt ié restountis.

  La partènço à l’ermitage pèr uno fèsto es l’encauso de faire d’óuferto pèr gramacia lou Sant. Quouro li parròqui pènson d’agué óutengu un favour particuliero de noste Sant, la participacioun i fèsto annalo crèis encaro mai.

 
[1]Écho de Saint Gens, avril 1893, p. 2

[2] aquesto tengudo sarié, au dire de la tradicioun, tout parié d’aquéu de ancian mountelen.

http://www.ribelly84.fr